Thursday, August 26, 2010

දේශපාලනේ හැටි බං ඔහොම තමයි


  1. සල්ලියි නම්බුවයි උපතින් හිමිවීලා
    ඇත දැන් අඩු බලය විතරයි සිහි වීලා
    ලඟ එන සමූපයෙ ඡන්දය ඉල්ලාලා
    "බලනව බලය කොහොමද ?" මුට්ටිය දාලා

  2. කාරක සභා කට්ටිය හමු වී මෙහෙම
    කියනව "උපරිමෙන් කරනව ආවහම"
    කොහොමින් කොහොම හරි ඡන්දෙන් ගෙන දිනුම
    පුටුව හිමි උනා සමිතියෙ මහ තැනම

  3. ඉඳගෙන හිටිය ටික දවසක් මෙහෙම්මම
    හැඟෙනව "අනේ ගැම්මක් නැහැ මට කිසිම"
    හිත හිත ඉන්න කොට ටික දවසක් මෙහෙම
    පුන්චි ඡන්දෙ ගැන කසු කුසු හැම තැනම

  4. "ප්‍රාදේශිකේ පැන ගත්තොත් ගොඩම තමයි
    පුංචි පහේ වැඩ ටිකකුත් ගමට කෙරෙයි
    මෙහෙම ඉන්නවට වැඩියෙන් ඒක හොඳයි
    ලොක්කා හමුවෙලා කිව්වොත් වැඩේ කෙරෙයි"


  5. "පලාත් සභාවේ ලොක්කත් මට කැමතියි
    නොමිනේෂන් ෂුවර් මම දැන් ගොඩම තමයි
    පටන් ගනිමු වැඩ ටික අද හෙටම ළමයි
    මගෙ මේ උත්ත්සහය ගම වෙනුවෙන්ම තමයි"


  6. බැනර් ගහල ගම හැම තැන සරසනවා
    පෝස්ටර් වලින් තාප්ප වනසනවා
    තැන තැන පුංචි රැස්වීමක් අමතනවා
    ගෙන් ගෙට ගොහින් "දෙන්නකො මට" පවසනවා

  7. පොඩි පොඩි සිද්දි සිදු වූවත් ගම මැද්දේ
    ලොකු ලොකු ආරවුල් නැහැ මේ පොඩි ඡන්දේ
    ගමේ හැමෝගෙම සහයෝගය මැද්දේ
    ඇහෙනව හැමතැනම අත්පොලසන් සද්දේ

  8. ඔන්න ඉතින් පොඩි ඡන්දෙන් ගොඩ යනවා
    පොඩි ගතියක් ඇතිව පුටුවක ඇල වෙනවා
    ඡන්දෙට ගිය මුදල් ගැන හිත කකියනවා
    "ප්‍රතිපාදන මුදල්" ගැන දැන් ඇහැ යනවා

  9. "බෝක්කුව හදමු ගානක් තියාගෙන"
    "පාරට තාර දාමුකො දී මගෙ ගාන"
    "කුණු ටෙන්ඩරේ උඹ ඇදපන් හැමදාම
    හැබැයි බං රජෝ අමතක නොකර මම"


  10. "ලොකු පුටු වල ඈයො මෙහෙමද ගහ ගන්නේ
    වැවකින් දිය දෝතක්නෙ අයියෝ මම ගන්නේ
    මීයක් කඩා අත ලෙව කා පල නැහැනේ"

    මෙහෙම හිත හිතා යහමින් ගහ ගත්නේ

  11. ඔන්න ඔහොම කාලය ගතවී යනවා
    ගහ ගත්තා උනත් ගම තුල වැඩ වෙනවා
    මේ හින්දාම නම ගම තුල බැබලෙනවා
    පළාත් සභා ඡන්දෙත් ලඟ ලඟ එනවා

  12. "ට්‍රයි කරලා බලමු ලොකු පුටුවක් ගන්න
    බැරි වෙන එකක් නැහැ කඩ ඉම පැන ගන්න"
    චිට් එක ලැබෙනවා ඡන්දය ඉල්ලන්න
    කට්ටිය සෙට් උනා ඡන්දෙන් ගොඩ යන්න

  13. පොඩි එක වගෙ නෙමෙයි මහ එක ජය ගන්න
    ලොකු ලොකු වැඩ ගොඩයි මුදලුත් නැහැ ඔන්න
    "මතකනෙ කරපු දේවල් උඹලට ඔන්න
    කෙරුවොත් උදවු මම දන්නව සලකන්න"

  14. බැනර් පෝස්ටර් පලාත බබලනවා
    පාට කිහිපයක් සටනට පිවිසෙනවා
    මනාප පොරයත් ජයටම සිදු වෙනවා
    ලොකු උන් ඉල්ලන්නෙ පොඩි උන් ගුටි කනවා

  15. ගම විතරක් නෙමෙයි පලාත හොල්ලනවා
    මීටින් ගොඩයි ලොක්කත් ඒවට එනවා
    මිතුරන්ගේ මුදල් ඡන්දෙට පිච්චෙනවා
    ඔන්න ඉතින් ඒ ඡන්දෙත් ගොඩ යනවා

  16. මන්ත්‍රී තුමා ගැන හැම තැන රැව් දෙනවා
    සහය දුන්න හැම සතුටින් ඉපිලෙනවා
    කළගුණ සලකන්න වාරය එලඹෙනවා
    බැඳගත් බෙරේ තාලයකට හඬ දෙනවා

  17. පොඩි තැන වගෙ නොවෙයි මේ තැන හරිම බරයි
    ප්‍රතිපාදනද, බදු සල්ලිද ජයට ලැබෙයි
    යටි මඩි, ජරා, ජඩ වැඩ අඩු වැඩිව කෙරෙයි
    හැමගේ උදවුවෙන් ඇදගෙන නාන හැඩයි

  18. "හන්දියෙ බාර් ප(ර්)මිට් එක මට දෙන්න"
    "වැලි ගොඩ දාන්නට මට අවසර දෙන්න"
    "අලුතෙන් හදන බිල්ඩිමෙ කඩයක් දෙන්න"
    තව වැඩ කෝටියයි කළගුණ සලකන්න

  19. "පාලම හදමු මට ගානක් තියාගෙන"
    "බස් ප(ර්)මිට් එකට කීයද මගෙ ගාන"
    "බිල්ඩින් එක ලොකුයි පාසලකට හදන
    කොන්ට්‍රැක්ට් එකට ලැබෙනව නොවැ මගෙ ගාන"

  20. පන්සල පල්ලියට කෝවිල හැම තැනට
    මරණෙට මගුලකට විවෘත කෙරුමකට
    අවුරුදු උත්ත්සවේ, අර මේ හැම එකට
    සල්ලි ඔහොම හෙව්වා ටික කාලෙකට

  21. දූෂණ, නාස්තිය, වංචා කනින් කොනින්
    ඇහෙනව උනත් ගානක් නැහැ ඒත් ඉතින්
    "ගෙයක් දොරක් වාහනයක් ගන්න ඉතින්
    සල්ලි නැතිව කොහොමද මම ඉන්නෙ තුටින්"


  22. වසර කිහිපයක් ගෙවුනා මේ ලෙසට
    ගම රට දන්න මිනිසෙකි මන්ත්‍රී කමට
    පේන්නනම් ලොකු වරදක් නැහැ පිටට
    දන්නෝ දනිති කරණා ටික ඔහු රටට

  23. පා(ර්)ලිමන්ට් එකේ කාලය හරියනවා
    විසුරුවා හැරල ඡන්දෙට දින දෙනවා
    අපේ උන්නැහෙත් තොල කට ලෙව කනවා
    අංකය ලැබෙනවා ඡන්දය ඉල්ලනවා

  24. හිතවත් ඈයො අත දිග හැර දෙයි සල්ලී
    දීලා කියනවා "සලකාපන් මල්ලී"
    මරුමුස් බුවාලත් හොඳ හොඳ දන්න කෙළී
    කට්ටිය සෙට් වෙලා ඡන්දෙට හරිම ජොලී

  25. තැන් තැන් වලදි පොඩි පොඩි වලි දාගන්න
    කඩු පොලු කිණිසි මදි මේ හැම හසුරන්න
    ස්වයංක්‍රීය බඩු තියෙනව ගස්සන්න
    ඔය හැම දේම හරි වටිනව ගොඩ යන්න

  26. මීටින් දිනෙන් දින පලාතෙ හැම තැනම
    මඩ ගහනා සේම කයිවාරුත් බොහොම
    "එක එක හෙන්චයියො කෑගැහුවත් කොහොම
    මම ඉටු කරනවා මගෙ යුතුකම පරම"


  27. ජර මර අස්සෙ මහ මැතිවරණෙත් අවසන්
    ඡන්ද ප්‍රතිඵලෙත් ආවා ඔන්න ඉතින්
    සමහර හිත් රිදිල, සමහරු නටති තුටින්
    අපේ උන්නැහෙත් දිනනව ඉහට උඩින්

  28. දැන්නම් වැඩ ගොඩයි බේරිල්ලක් නෑනේ
    වාදෙට විවාදෙට කරුණුත් ඕනෑනේ
    වාහන ගෙවල් නිල නාමෙට ලැබුනානේ
    ඒ හැම අස්සෙ සලකන්නත් ඕනෑනේ

  29. මරුමුස් බුවාලට ජොබ් එක සෙට් වෙනවා
    නෑදෑ හිතවතුන් ජාමෙට ගොඩ යනවා
    ඇල්ලූ පන්දමෙන් ලොකු එලියක් එනවා
    එහා පැත්තෙ ජීවිත කළුවර වෙනවා

  30. ඉඳල හිටල රට සවාරි සෙට් වෙනවා
    නයිට් ක්ලබ් එකට ඉඳ හිට රිංගනවා
    කෑම වගේමයි ජරාව දිරවනවා
    බලා ඉදිද්දී ඇඟ පත පිම්බෙනවා

  31. "ඕ.අයි.සී කවුද මේ පොලිසියෙ ඉන්නා
    උදේ ඇල්ලුවද අර අහවල් දෙන්නා ?"

    "ඇල්ලුව සර් කසිප්පු සහ උන් දෙන්නා"
    "නිදහස් කරනු ! ගන්නෙ නැතුව මල පන්නා"

  32. මුල් ගල් තියනවා ඒවා පැල වෙනවා
    එක දෙක හැදෙනවා ජරාව වෑහෙනවා
    එකෙකුට එකෙක් නොදෙවෙනි ලෙස වැඩ දෙනවා
    අපේ උන්නැහෙගෙ හොඳ කල එළඹෙනවා

  33. ඇමති කම් ලැබිල දැන් හරි සරු සාරයි
    කොමිස් කුට්ටි වල බර දැන් හරි ඉහලයි
    "රටට පෙර තමන්" ආදර්ශය බබලයි
    දේශපාලනේ හැටි බන් ඔහොම තමයි

  34. තියෙනව ලියනවානම් තව කරුණු ගොඩක්
    ඒවා නොලිව්වොත් එය මහ හිතට බරක්
    එනවා අරන් තව කවි පද පේළි ටිකක්
    කංචුගෙ බ්ලොග් එකෙන් හමුවෙමු නැවත වරක්

    සටහන:-
    අනුපිළිවෙල කොහොම උනත්
    කොයි කඩ ඉම මග ඇරුනත්
    සිරිලංකාවේ කවුරුත්
    දන්න දෙයක් එදත් අදත්

    හෙටයි කියල වෙනසක් නෑ
    සිද්ධ වේවි හැමදාමත්
    වෙනස් උනොත් බැරි වීවත්
    කලක් යාවි මේ රටටත්

Friday, August 13, 2010

කම්බ හොරු 02 ( මැණික් පැන්නීම )


මේ සිදු වීමත් අර රත්‍රන් අලි හොරකම සිදු උන කාලෙදිම සිදු වෙච්ච හොරකමක්. මේ හොර දෙටුවන්ගෙ විශේෂ දක්ෂකම තමයි අපි හැමෝම නොදකින පැත්තක් ගැන හොරා විසින් සම්පූර්ණ විශ්වාසයකින් හොරකම සිදු කිරීම.
මේ සිදුවීමට අදාල ප්‍රදේශයනම් රත්නපුර. රත්නපුර නගරයේ ඉහල ආරක්ෂාවක් තියෙනව වගේම, නගරයේ තියෙන සෑම මැණික් කඩ සාප්පුවක්ම තම තමන්ගෙ ආරක්ෂාව ගැන දක්වන්නෙ බොහොම ලොකු උනන්දුවක්.
දවසක් මේ එක මැණික් සාප්පුවකට උදේ පාන්දරම සාප්පුව ඇරපු ගමන්ම වගේ ජැන්ඩි පහට ඇඳගත්තු තරුණ හාදයෙක් ගොඩ උනා.
"මට ලක්ෂ 50 ක් විතර වටින මැණිකක් ඕන කරල තියෙනව. මගෙ යාලුවෙක් අඳුනන ජර්මන් කපල් එකක් ලංකාවට ඇවිත් ඉන්නව. එයාලට තමයි මැණික ඕන කරන්නෙ. යාලුව මට කිවුව ගානක් තියාගෙන හොඳ එකක් බලන්න කියල."
මේ හාදය චුයින්ගම් එකක් හපන ගමන් තමන් පැමිණි කාරනාව සාප්පුවෙ අලෙවි සේවකයින්ට පැහැදිලි කලා.
ටිකක් වෙලා කතා බහ කර හිටියහම සාප්පුවෙ අයට තේරුනා මේ මෑන්ට මැණික් ගැන හොඳ දැනුමක් තියෙන, මැණික් බිස්නස් කරල හොඳට පුරුදු පොරක් බව.
"මේ රාක්ක වල තියෙන්නෙ වටිනාකම අඩු ඒව. අපි අතුලෙ තියෙන රූම් එකට යමු. අපේ වටින මැණික් තියෙන්නෙ එතන." එහෙම කියල සාප්පුවෙ ඉන්න සේවකයෙක් මේ තරුණයාව ඇතුලට එක්ක ගියා.
කොහොමින් කොහොම හරි වටිනා කියන මැණික් ගල් කිහිපයක් තෝරා, ඒවායින් එකක් මිලදී ගන්න මේ දැන්මම ඉතා ඉක්මනින් මුදල් රැගෙන නැවත පැමිණෙන බව කියන ගමන් මේ තරුණය යන්න හැදුව.මේ අතරෙදි තමන් ආරක්ෂිත තැන් වලින් එලියට ගත්ත මැණික් නැවත අහුරමින් සිටි සාප්පුවෙ අයට තේරුනා ලක්ෂ 50කටත් වඩා වටින එක් මැණිකක් අඩු බව.
" මම ආවෙ බිස්නස් එකක් කරන්න මිසක් හොරකම් කරන්න නෙමෙයිනෙ." සාප්පුවෙ අයගෙ මූලික ප්‍රශ්ණ කිරීම් හමුවේ තරුණය දුන්නෙ එහෙම පිලිතුරක්. ඒ පිලිතුරෙන් සෑහීමකට පත් නොවුන සාප්පුවෙ හිමිකාර මෑන් මේ තරුණයගෙ ඇදුම් ගලවල චෙක් කරන්න තීරනය කලා. මුලින් ටිකක් අකමැති උනත් තමන්ගෙ නිර්දෝශී බව ඔප්පු කරන්න තරුණය ඒ තීරනේට එකඟ උනා. ඒත් මැණික හම්බ උනේ නැහැ.
මැණික ගිල්ල වෙන්නත් පුලුවන්. එහෙම සැක කරල අන්තිමට x-රේ එකක් අරගන්න තැනට වැඩේ දුරදිග ගියා. ඒකත් කරල අන්තිමට තරුණය මැණික ගිලල නැති බවත් තහවුරු කර ගත්ත.
"අපිට ඔයාව සැක කරන්න උනාට සමාවෙන්න.අපේ අයගෙ අතින් කොතන හරි වැරැද්දක් වෙලා ඇති. මහත්තය ඕන වෙලාවක ඇවිත් අපෙන් බඩු ගන්න. අපි අඩු කරල දෙන්නම්." සාප්පුවෙ හිමිකරු එහෙම කිවුවෙ තව දුරටත් මේ තරුණයාව සැක කරන එක තේරුමක් නැති දෙයක් කියල හොඳින්ම තේරුම් ගත්ත නිසාමයි.තරුණය පිටත්ව ගියාට පස්සෙත් නැති වුන මැණික හෙවුවත් හොයාගන්න බැරි උනා.
දවස් කිහිපයක් ගෙවිල ගියා.
" අපරාදෙ .... එදා බිස්නස් එක ගහල ගියානෙ. බලමු අදත් ටිකක් වටින එකක් "දවසක් උදෙන්ම මෙහෙම කියාගෙන අර තරුණ පොර මැණික් සාප්පුවට ගොඩ උනා.සාප්පුවෙ අයටත් අවිස්වාස කරන්න දෙයක් නැති නිසා සාප්පුව ඇතුලෙ වටිනා මැණික් තියෙන කොටසටම මේ තරුණයව කෙලින්ම අරගෙන ගියා.
"අද මගෙ කස්ටමර්ට හරියන ගලක් මෙතන නැහැ. මට පොඩ් එකක් ඕන කරලත් තියෙනව. බලමු පොඩි ගලක්"මෙහෙම කියපු පොර මේ සාප්පුවෙන් ලක්ෂ 3 1/2 කට පොඩි මැණිකකුත් අරගෙන යන්න ගියා.
මෙහෙම කාලය ගෙවිල ගියා. සාපිපුවෙ හිමිකරු ලක්ෂ 50 මැණික ගැන අදහස අත්හැර ගත්තෙ වෙන කරන්න දෙයක් නැති නිසාමයි. සති කිහිපයකට පස්සෙ මේ මැණික් සාප්පුවෙ අය ඔක්කොම එකතු වෙලා සාප්පුව අස්කරන්න ගත්ත. එහි වැඩ කරන සේවකයෙක් අහම්බෙන් දැකපු දෙයක් සාප්පුවෙ හිමිකාර මෑන්ට පෙන්නුව. ඔන්න එතකොටයි සති කීපයකට උඩදි ලක්ෂ 50 මැණිකට උන දේ හැමෝටම තේරුනේ.
සාප්පුව අතුලෙ වටිනා මැණික් තියෙන කොටසෙ තිබුන මේසයක යට පැත්තෙ අලවල තියෙන චුයින්ගම් එකක මැණිකක සළකුණු යස අගේට සටහන් වෙලා තියෙනව.දෙවෙනි පාරට ලක්ෂ 3 1/2 මැණික ගන්න ඇවිත්, අරගෙන ගිහින් තියෙන්නෙ ඒ ලක්ෂ 3 1/2 මැණික විතරක් නෙමෙයි කියල කාට කාටත් තේරෙනකොට.......
මේකත් සත්‍ය සිදුවීමක්.මේ සිද්දියත් කියවපු පත්තරේ මතක නැහැ වගේම ඒක වාර්තා කලේ කවුද කියලත් මතක නැහැ....
අන්තිමේදි කියන්න තියෙන්නෙ "අපිට මේව හොඳ පාඩම්" කියල තමයි ඉතින් නේද??

Saturday, August 7, 2010

කම්බ හොරු 01 - ( අලි හොරකම )


මේ කතාවට අදාල ප්‍රදේශය ටිකක් නාගරිකයි.... මේ නගරයේ තිබුන උකස් මධ්‍යස්ථානයකට දවසක් තරුණයෙක් ගොඩ වැදුන... ඊ ලගට තරමක් බර පාර්සලක් බොහොම පරිස්සමට කවරයකින් එලියට අරගෙන උකස් මධ්‍යස්ථානයේ කවුන්ටරයට ඉදිරිපත් කලා... මේ වෙලාවෙ කවුන්ටරයෙ හිටියෙ මේ උකස් මධ්‍යස්ථානයෙ අයිතිකරුමයි.මෙයාට රත්‍රන් බඩු කඩයකුත් තිබුන ඒ ටවුන් එකේම.
"අයිය.. මට මේකට ලක්ෂ 5 ක් ගන්න පුලුවන්ද? "
ඒක රනින් නිම කල අලියෙකුගේ අනුරුවක්. කඩයේ අයිති කාර මෑන් රන් අලියව අතට ගත්ත.
" කොහොමද මම මේක චෙක් කරන්නෙ? රත්‍රන් ගාලද දන්නෙ නැහැනෙ. ඇතුල රත්‍රන්ද කියල සූරල බැලුවත් හොයාගන්න බැහැ සමහර විට. හරියටම චෙක් කර ගන්න ගැඹුරට සිදුරක් විදින්න ඕන. "
අලිය අරගෙන ආපු පොර මුලින් ටිකක් අදි මදි කලත් පස්සෙ වැඩේට කැමති උනා.
"වෙන කරන්න දෙයක් නැත්නම් ඒක කරමු. මට සල්ලි හදිස්සියි."
කොහොමින් කොහොම හරි අන්තිමේදි දෙන්නගෙම කැමැත්තෙන් අලියගෙ බඩ මැදින් ටිකක් ඇතුලට විදල අලිය දඹ රත්‍රන් බව තහවුරු කර ගත්ත.ඊ ගාවට තවත් ප්‍රශ්නයක්....
"මේකෙ බරට, අපේ රේට් එක්ට ඔයාට දෙන්න පුලුවන් ලක්ෂ 3 1/2 ක් විතරයි මල්ලි " කඩයේ අයිති කාර මෑන් එහෙම කියුව.
"බෑ බෑ අඩුම ගානෙ මට ලක්ෂ 4 1/2 ක් වත් ඕන." අලිය අයිති පොරත් අප්සෙට් එකෙන් කිව්ව.
ඒත් උකස් මධ්‍යස්ථානයෙ අයිතිකරු කිවුවෙම ලක්ෂ 3 1/2 වැඩිය දෙන්න බෑ කියලමයි.
"දෙන්නකො ඔය අලිය, මම තව තැන් කිහිපයකින් අහලම එන්නම්." තරුණය අලියත් අරගෙන පිටත් උනා.
"ඔය ගියාට ආපහු එයි. අනිත් තැන් වලින් ඔය ගානවත් දෙන්නෙ නැහැ." උකස් කඩේ අයිතිකරු තමන්ටම එහෙම කියා ගත්තෙ, තමන් දෙන්නට හැදූ මුදල ඉතා සාධාරණ බව දන්න නිසාමයි.
පැය බාගයක් විතර යනකොට අර තරුණය මූණ ඤොරොක් කරගෙන ආපහු අර උකස් මධ්‍යස්ථානයටම ආව.
" අනිත් තැන් වලින් දෙන්න කැමති උපරිම ලක්ෂ 3 යි. ලක්ෂ 3 1/2 ක් දෙන්න කැමති උනේ අයිය විතරයි. ඒකවත් දෙන්න. මට සල්ලි හදිස්සියි."
"ඒකනෙ මල්ලි, මගෙ ගාන සාධරණයි "
ඉහේ පිපුන මල් ටික පරිස්සමට අත ගානව තරම් පරිස්සමට අලියව අතට ගත්තු කඩයේ අයිති කාර මෑන් අලියගෙ බඩ මැද විදපු සිදුර දිහා බලන ගමන් සිහින් සිනාවක් දැම්ම. ගනු දෙනුව ඒ විදිහට අහවර උනා..............
ටික කාලයක් ගත උනා. රත්‍රන් අලිය සින්න උනා. සින්න උන දඹ රන් අලියා උනු කර රත්‍රන් බඩු හදන්න තමන්ගෙම රත්‍රන් බඩු කඩයට රත්‍රන් ආභරණ සාදන අයට බාර දුන්න.
උකස් මධ්‍යස්ථානයෙ අයිතිකරුට දෙලෝ රත් වූවේ එවිටයි. රත්‍රන් අලියා පිත්තල වී ඇත. ඒත් රත්‍රන් අලියාගේ බඩ මැද සිදුරත් එහෙමමයි.
ටිකක් හිතල බලන කොටයි වැඩේ තේරුනේ.
අර රත්‍රන් අලිය උකස් කරන්න ආපු තරුණය සැබෑ රත්‍රන් අලියෙකු අරගෙන ඇවිත් එය නියම රත්‍රන් බව ඔප්පු කරල, ලක්ෂ 3 1/2 ක් මදි කියල ඒ රත්‍රන් අලියා ආපහු අරගෙන ගියානෙ. ඒ ගිහින් කරල තියෙන්නෙ ඒ හා සමාන රත්‍රන් ආලේප කරපු පිත්තල අලියෙකුගේ බඩ සිදුරු කරල, එම පිත්තල අලියා අරගෙන ඇවිත් ඒක උකස් කරල. මේ ටික උකස් මධ්‍යස්ථානයෙ අයිතිකරුට තේරෙන කොට.....


සෑහෙන කාලෙකට ඉස්සර සිදු වුන සත්‍ය සිදුවීමක් මේක. කියවපු පත්තරේ මතක නැහැ වගේම ඒක වාර්තා කලේ කවුද කියලත් මතක නැහැ...මතක තිබුන ටිකට වචන ගැලපුව ඔන්න. හොරකම් කරන ක්‍රම වල නවමු සංකල්ප බොහොමයක් අපිට හොඳ පාඩම්. එහෙම නේද??

Monday, August 2, 2010

විසිල් එකක්... මලා හුටා.....


විසිල් එකක්... මලා හුටා.....
ලයිසන් එක...?
මෙන්න සර්...
ඉන්ෂූරන්ස්...?
මෙන්න සර්...
කොහෙද යන්නෙ...?
හයර් එකක්...
කෙල්ලො ටිකක්....?
ගාමන්ට් එකෙ...
හැට හතරයි....
තාම තිහයි....
වේගෙ ඕයි....
වැඩිද සර්....?
ඒක තමයි...
ඉතින් සර්.....?
එකේ ඉදන්....
ඉතින් සර්.....?
දැන් පහයිනෙ...
ඉතින් සර්.....?
වතුරත් නැහැ...
ඉතින් සර්....?
දඩේ ලොකුයි....
ඒක තමයි....
හිතන්නෙපා පගා දෙන්න....
ජීවිතේට දීලත් නැහැ....
දඩේ ලොකුයි....
ඒක තමයි....
ලියමු දඩේ....
අනේ සර්....
හිතල බලමු....
එලනෙ සර්....
දැන් පහයිනෙ....
ඉතින් සර්.....?
වතුරත් නැහැ...
ඉතින් සර්....?
දඩේ ලොකුයි....
මේක ගන්න.....
එහෙම හොඳයි....
හික්..හික්..හික්..
සීයද බං.....?
අනේ සර්....
හ්ම්...හ්ම්...
ලයිසන් එක...?
මෙන්න ගනින්...
ඉන්ෂූරන්ස්...?
මෙන්න ගනින්...
යන්නම් සර්....
හ්ම් පලයන්....
විසිල් එකක්... මලා හුටා.....
Related Posts with Thumbnails